صيام داود
صيام داود أو خلينا نقول تكنيك الصيام الجاف
طريقته وتفاصيله ومميزاته وكمان الأسباب هتكون في المقال ده
الفكرة: فكرة الكيتوسيس بتدور حوالين انك تحافظ على الانسولين بدون تحفيز قدر المستطاع عشان الجسم يقدر يسحب من الدهون المخزنة و يطلعلنا طاقة ، و فكرة الصيام المتقطع نجحت جدا مع الكيتو عشان في الصيام المتقطع انت بتخلي الجسم يقعد ساعات طويلة (من 16 إلى 24 ساعة حسب صيامك) وبالتالي بيهضم الأكل اللي اتاكل قبل وقت الصيام و بيستمر 8 ساعات أو أكثر بيسحب طاقة من الدهون المخزنة.
خد عندك بقي المعلومة ديه كمان: الجسم بعد فتره من التعود على الأكل بنظام معين بيبدأ يتأقلم لأن أصلا فكرة حرق الدهون عكس طبيعة الجسم ، وممكن تلاقي جسمك توقف عن الحرق أو اتبقى جزء مهم مش عايز ينزل خالص زي الكرش مثلا (مأساتنا كلنا) ، و محافظ على دهونه ، ربنا خلق أجسامنا بتخزن عشان لما نحتاج نلاقي متخزن في الضرورة بس
هتكون ايه أكثر من الميه ؟
لما بتعطش في رمضان مش بتلاحظ إن العطش ده بيكون ساعات و بعد كده بيختفي ؟ ليه ؟
هقولك ليه: من مكونات خلية الدهون الهايدروجين ، و من مكونات الميه الهايدروجين ، و الجسم وقت الحاجه للميه بيضطر يكسر خلية دهون عشان ياخد منها 2 هايدروجين و يعمل منها ميه بدمجها مع واحد اوكسجين و بالتالي يطلع للجسم H2O الي هي مية.
أول حاجة جت على بالك: طيب الحل ايه ؟
يالا خلينا نبطل أكل وشرب لحد ما نخس خالص؟
هقولك لا كده هتخدل في مشكلة تانية لأن الموضوع مش ميه بس ، الجسم بيحتاج احماض أمينية و أملاح و معادن و الاستمرار لفترات طويله هيدخل جسمك في حسبة أوتوفاجي وستارفيشن و دي مش هي حسبة التخسيس ، و عملها محتاج حسابات تانية غير حسابات الناس اللي عايزه تخس.
هنستفيد ازاي من فكرة تكسير الدهون بسبب الصيام الجاف (Dry fasting) و في نفس الوقت مدخلش في حسابات الأوتوفاجي و الستارفيشن؟
هنتبع صيام داود او صيام جاف مع أكل الكيتو
من الآخر كده صوم يوم و افطر يوم و كله داخل الكيتو
هتصوم يوم جاف (من 12 إلى 18 ساعة بدون ماء أو أكل أو شرب نهائي) و تفطر على أكل كيتو ، و ثاني يوم تاكل كيتو عادي جدا حسب جوعك زي ماحنا بنعمل ، جعان كل اللي يسد جوعك شبعان اشرب ميه بس أو بمعنى آخر أسهل لو انت لو بتحب الصيام الإسلامي يبقى هتصوم يوم إسلامي ، من الفجر للمغرب و تفطر على أكل كيتو زي ما شرحت فوق.
فوق الطريقة وهنا بقي أنا هوضحلك التكنيك:
1- الحساب هيكون بالأسبوع ، مش باليوم
2- لو جه وقت الفطار و انت مش جعان افطر ميه بس ، متاكلش
3- السحور مش لازم يكون متأخر قوي ، تقدر تتسحر الساعة 9 مثلا ، و تصحى قبل الفجر تتسحر ميه فقط
4- خضار ورقي كثير كل يوم (سواء كان مطبوخ أو سموذي أو ني ، اتصرف)
5- مش لازم تكمل نسبة بروتينك ، بس على الأقل تجيب 65% منها
6- مش لازم تكمل نسبة دهونك لو شبعان
طيب مين هيقدر يطبق اللى اتقال ده كل الناس لا طبعا
اللي هيقدر يطبق الناس اللي بقالها أكثر من شهر كيتو ، بلاش الجداد لأن هيكون صعب عليهم ، بعد شهر كيتو الصيام ده هيكون أسهل حاجه تعملها و مش هتاخد بالك منه أساسا لأنك بتكون مش جعان و عندك طاقه و تركيز تخليك متحسش إن اليوم بيعدي عليك و انت صايم أصلا.
والمدة:
على فكرة النظام ده آمن جدا و مجرب و تقدر تستمر عليه حتى بعد ما تخلص كيتو و تمشي لو كارب ، لأن مخازن جسمك مبيعديش عليها 72 ساعة إلا و داخلها أكل أو شرب ، انت بتستفيد بس باليوم اللي بتعمل فيه صيام جاف أو اسلامي لمدة من 12 ل 18 ساعة بتكسر فيها دهون أكثر و بتحسن حالة الكيتوسيس بشكل ملحوظ و اللي عنده قياس دم هيلاقي بعد الصيام ده باسبوع أو عشر أيام الرقم بقى فوق ال 2.5 بدل ال 1 و الكلام ده ، وللي عنده شريط بول هلاقي اللون بقى أغمق من زمان.
سؤال تاني عارف أنك هتسأله وجه على بالك
إيه الفوائد بقي؟
تحسين حالة الكيتوسيس ، كسر الثبات ، زيادة الطاقة ، و لو انت مسلم ، يبقى خد نية الصيام لعله يتحسبلك بدل مانت مبتعملش حاجه فحياتك كده ، و لو انت مسيحي يبقى سميه دراي فاستنج (dry fasting ) يا سيدي بدل صيام إسلامي
يا ريت اللي يجرب الصيام ده مع الكيتو ياخد باله بعد عشر أيام اسبوعين كده ايه الأخبار في النقاط التالية :
1- تحسن المزاج العام و الاحساس بالطاقة
2- تحسن حالة الكيتوسيس سواء برقم الكيتون في الدم أو شريط البول
3- كسر الثبات في حال التجربة لأسبوعين أو أكثر
وبكده خلص مقالنا بس مخلصتش معلوماتنا
تابعنا وأكيد معانا هستفيد